Macallai: Rabháin, Búrdúin agus Greann

Le Barra Ó Donnabháin

Bhí beirt fhear ag teacht ó aonach fadó. Bhíodar ag druidim lena gceantar féin agus bhí radharc breá acu ar reilig siar uathu. "Thall ansan a chuirfear mise," arsa duine acu, "má mhairim chuige."

Bhí buachaill ag aoireacht bó d’fheirmeoir lá nuair a ghaibh sagart an bóthar. "Cá bhfuil fear na mbó?" arsan sagart leis. "Nách shin é thuas i mbarr na páirce é," arsan buachaill agus dhírigh sé a mhéar ar an dtarbh.

Ag trácht ar ainmhithe, chúm file darbh ainm Gearóid na Caillighe an píosa seo, mar fhógra, do fhear a raibh a asal ar seachrán uaidh.